काठमाडौँ, भदौ २६। राष्ट्रिय एकता दलले भोटेकोशी बाढीमा परी ज्यान गुमाएका दिवङ्गत आत्माहरूको शान्ति, सद्गति एवं मोक्षको कामना गर्दै पशुपतिनाथ मन्दिरस्थित बागमती घाटमा जल तर्पण तथा श्रद्धाञ्जली कार्यक्रम सम्पन्न गरेको छ।
हिन्दू परम्पराअनुसार औँसीको पावन अवसर पारेर आयोजना गरिएको कार्यक्रममा भोटेकोशी बाढी तथा अन्य विपद्मा परी ज्यान गुमाएका नागरिकहरूको सम्झनामा विधिपूर्वक जल अर्पण गर्दै श्रद्धाञ्जली व्यक्त गरिएको थियो।
श्री पशुपतिनाथ मन्दिरको पूर्वी गेटस्थित बागमती घाटमा अपराह्न ४ बजे सम्पन्न कार्यक्रममा राष्ट्रिय एकता दलका अध्यक्ष विनय यादव, केन्द्रीय नेता तोयानाथ दाहाल, पुस्ता लामा (पाथीभरा माता), विनोद सिंह लगायत दलका नेता तथा कार्यकर्ताहरूको सहभागिता रहेको थियो। सहभागीहरूले एक–एक लोटा जल अर्पण गर्दै दिवङ्गत आत्माको चिरशान्तिको कामना गरेका थिए।
कार्यक्रमलाई सम्बोधन गर्दै राष्ट्रिय एकता दलका अध्यक्ष विनय यादवले भोटेकोशी बाढीमा ज्यान गुमाएका नागरिकहरूप्रति राज्यले पर्याप्त संवेदनशीलता नदेखाएको भन्दै सरकारको ध्यानाकर्षण गराउनुभयो।
सरकारले भदौ २२ गते राष्ट्रिय शोक घोषणा गरे पनि सार्वजनिक बिदा नदिएकोप्रति आपत्ति जनाउँदै अध्यक्ष यादवले विपद्मा ज्यान गुमाएका नागरिकप्रति राज्यको तर्फबाट सम्मान र संवेदना प्रकट हुनुपर्ने बताउनुभयो।
उहाँले भन्नुभयो, “विपद्मा ज्यान गुमाएका नागरिकहरूप्रति राज्यको तर्फबाट पूर्ण सम्मान र संवेदना प्रकट हुनुपर्छ। केवल राष्ट्रिय शोक घोषणा गरेर मात्र पुग्दैन। सरकारले प्रत्येक वर्ष भदौ २२ गतेलाई भोटेकोशी बाढीमा ज्यान गुमाएका नागरिकहरूको स्मरणमा राष्ट्रिय शोकसहितको स्मृति दिवसका रूपमा मनाउनुपर्छ।”
राष्ट्रिय एकता दलले बाढीबाट प्रभावित तथा पीडित परिवारलाई तत्काल उचित राहत, क्षतिपूर्ति र पुनर्वासको व्यवस्था गर्न सरकारसँग माग गरेको छ। साथै, भोटेकोशी बाढीमा ज्यान गुमाएका नागरिकहरूको स्मृतिलाई संस्थागत गर्न प्रत्येक वर्ष भदौ २२ गतेलाई स्मृति दिवसका रूपमा मनाउने व्यवस्था गर्नसमेत सरकारको ध्यानाकर्षण गराएको छ।
तपाईको ईमेल गोप्य राखिनेछ