लहान,२६ चैत । बाँसको महत्व तथा यसको बजारीकरणको विषयमा सरोकारवालाहरूसँगको एकदिने कार्यशाला गोष्ठी लहानमा सम्पन्न भएको छ ।
सुरक्षित आवास परियोजना अन्तर्गत Hilti Foundation, Habitat for Humanity नेपालको आर्थिक सहयोग तथा भवानी एकीकृत विकास केन्द्र, धनगढीमाई नगरपालिका–२ भवानीपुर, सिरहाको आयोजनामा कार्यक्रम सम्पन्न भएको हो ।
कार्यक्रमबारे जानकारी दिँदै केन्द्रका सामाजिक परिचालन अधिकृत ज्ञानदीप चौधरीले बाँसको महत्व र बाँस उपचार प्रविधिबाट निर्माण गरिने सुरक्षीत आवास घर बारे जनचेतना अभिवृद्धि गर्ने उद्देश्यले कार्यक्रम आयोजना गरिएको बताए ।
उनका अनुसार उपचार प्रविधिबाट निर्माण गरिएका बाँसका घर वातावरणमैत्री, टिकाउ तथा सुरक्षित हुने गर्छन्। “यस्ता घरहरू हत्तपत्त आगो नलाग्ने, हुरीबतासले असर नगर्ने, बाढीले नबगाउने र भूकम्पको जोखिम पनि न्यून हुने भएकाले कम लागतमा सुरक्षित आवासको उत्कृष्ट विकल्प हुन्,” उनले भने।
चौधरीका अनुसार बाँसको एउटा घर निर्माण गर्न करिब ४ लाख ५० हजार रुपैयाँ लागत लाग्नेछ, जसमा दुईवटा सुत्ने कोठा, एउटा भान्सा र एउटा शौचालय निर्माण गर्न सकिन्छ। यस्ता घरहरूको आयु करिब ३० वर्षसम्म हुने उनले जानकारी दिए । कम लागतमा आकर्षक र सुरक्षित घर निर्माणका लागि सबैलाई उपचार प्रविधिबाट बनाईएको बाँसको घर निर्माण गर्न उनले आग्रह गरे।
तालिम प्राप्त दक्ष जनशक्तिबाट सिरहाको धनगढी बजारमा बाँस उपचार केन्द्र सञ्चालनमा रहेको उल्लेख गर्दै उनले सर्वसाधारणलाई उक्त केन्द्रमार्फत बाँसको घर निर्माण गर्न अनुरोध गरे।
सुरक्षित आवास परियोजना अन्तर्गत लहान नगरपालिकाका वडा नं. १२, १३, १५, २१ र २२ मा विपन्न मुसहर समुदायका लागि हालसम्म १ सय १८ वटा घर निर्माण गरी हस्तान्तरण गरिसकिएको छ भने चालु आर्थिक वर्ष २०८२/०८३ मा लहान नगरपालिकाको वडा नम्बर ७, ८, १०, १३, १५, १८, १९, २०, २१, २२ र २४, मा १ सय घर निर्माण कार्य भइरहेको छ। जसमध्ये केही वडामा यसै आर्थिक बर्षभित्र घर हस्तान्तरण हुनेछ ।
परियोजनाका संयोजक कृष्णकुमार राईका अनुसार प्रत्येक घर निर्माणका लागि लहान नगरपालिकाबाट ३ लाख रुपैयाँ र परियोजनाबाट १ लाख ५० हजार रुपैयाँ विनियोजन गरिएको छ। उनले विगत तीन वर्षदेखि सिरहा जिल्लामा उक्त परियोजना सञ्चालनमा रहेको र अघिल्लो आर्थिक वर्ष कर्जन्हामा कार्यक्रम सञ्चालन गरिएको बताए। हाल लहान नगरपालिकामा कार्यक्रम सञ्चालन भइरहेको उनले जानकारी दिए।
उनका अनुसार प्राविधिक इन्जिनियरको डिजाइन अनुसार घर निर्माण गरिन्छ।
कार्यशालाको सहजीकरण बेत, बाँस तथा जडीबुटी विज्ञ (पिएचडी) सी.एल. चौधरीले गरेका थिए। कार्यक्रममा बाँस उपचार केन्द्रका सञ्चालक, बाँस उत्पादन गर्ने किसान, घर निर्माणमा संलग्न कामदार तथा मिस्त्रीलगायत करिब २० जनाको सहभागिता रहेको थियो ।
तपाईको ईमेल गोप्य राखिनेछ