संजय विश्वकर्मा
लहान , ०६ बैशाख । सिरहाको लहानमा आजबाट जग्गाको कित्ताकाट खुलेको छ । २४ वटा वडा रहेको लहानमा पहिलो चरणमा वडा नं. ४ को कित्ताकाट खुलेको मालपोत कार्यालय लहानका प्रमुख दिपेन्द्र नारायण चौधरीले जनाएको छ । अन्य बाँकी रहेको वडाहरुको जग्गाको वर्गिकरण सहितको फाईल / निवेदन पालिकाले पठाएमा केहिदिन भित्रै सम्पूर्ण वडाको कित्ताकाट सुरु गरिने प्रमुख चौधरीले जनाए ।
सिरहा जिल्लाको १७ स्थानीय तह मध्ये ९ वटा स्थानीय तहको काम मालपोत कार्यालय लहानबाट भैरहेको छ । लहान नगरपालिकाले मात्र जग्गा वर्गिकरणको फाईल मालपोल कार्यालयमा पठाएको हो,’ प्रमुख चौधरीले भने । अन्य पालिकाबाट हाल सम्म मालपोत कार्यालयमा वर्गीकरण भएका निवेदन सहितको फाईल नआएकोले काम अगाडी बढ्न नसकेको बताए । लहान, धनगढीमाई, सुखिपुर र गोलबजार नगरपालिका त्यसैगरि सखुवानन्कारकट्टी, लक्ष्मिपुर पत्तारी, नवराजपुर, भगवानपुर, बरियारपट्टी गाउँपालिकाको जग्गाको काम मालपोत कार्यालय लहानबाट भैरहेके छ ।
यता लहान नगरपालिकाका ई. एकमणि सिपलियाले बाँकी वडाहरुको वर्गिकरण सहितको फाईल एक हप्ता भित्रै मालपोत कार्यालय लहानलाई पठाउने प्रयास भैरहेको साझा खोज डट कमलाई बताए । उनले बाँकी सवै वडाको कित्ताकाट साता भित्रै सुरुहुने दावी गरे ।
लहान नगरपालिका क्षेत्रभित्रको जग्गाहरुको वर्गीकरण भुउपयोग परिषद् र कार्यपालिकाको बैठकबाट मिति २०७९ फाल्गुन १४ गते निर्णय गरिएको थियो । २०८० बैशाख ५ गतेबाट लागु हुने गरि नयाँ घर निर्माणको इजाजत लिने सेवाग्रहीका लागि भू –उपयोग ऐनको दफा ११ र १२ को अधिनमा रहि कार्यान्वयन गर्न / गराउन पालिका मातहतमा रहेको शाखा र वडा कार्यालयहरुलाई निर्देशन दिईसकेको नगर प्रमुख महेश प्रसाद चौधरीले बताएको छ ।
भूमि व्यवस्था सहकारी तथा गरिबी निवारण मन्त्रालयले गत मङ्सिर २२ गतेसम्म स्थानीय सरकारले स्थानीय भू–उपयोग परिषद्बारा जग्गाको बर्गिकरण गर्न आदेश दिएको थियो । भूउपयोग नियमावली २०७९ कार्यान्वयनमा आईसकेको अवस्थामा जग्गाको वर्गीकरण गरिसकेका स्थानीय तहहरुको कित्ताकाट खुलेको हो ।
संघीय सरकारले स्थानीय तहहरुलाई शहरी ,अवास, औधोगिक क्षेत्र, बनजंगल, खोलानाला लगायत १० प्रकारको जग्गाहरुको भूउपयोग परिषदद्वारा वर्गीकरण गर्ने अधिकार दिएको छ ।
तपाईको ईमेल गोप्य राखिनेछ