जनकपुर — जनकपुरधाममा पहिलोपटक अन्तराष्ट्रिय इन्डस्ट्रियल एक्सपो २०२५ हुने भएको छ। उद्योग परिसंघ, प्रदेश नं. २, सिया इभेन्ट्स र ग्लोब टेक इन्डियाको संयुक्त आयोजनामा एक्सपो हुने जनाइएको छ।
शुक्रबार जनकपुरधाममा आयोजित पत्रकार सम्मेलनमा आयोजक संस्थाका पदाधिकारीहरुले आगामी कार्तिक २७ देखि ३० गतेसम्म तिरहुतिया गाछीमा एक्सपो आयोजना हुने जानकारी दिएका हुन्।
उद्योग परिसंघ मधेश प्रदेशका अध्यक्ष प्रमोद साहका अनुसार एक्सपोले उद्योग, कृषि र अटोमोबाइल क्षेत्रका उत्पादन र प्रविधिहरुलाई एउटै मंचमा ल्याएर नेटवर्किङ, सहकार्य र भविष्य निर्माणमा टेवा पुर्याउनेछ। उनले एक्सपोमा व्यवसायिक मिलन (B2B) का लागि विशेष वातावरण तयार पारिएको र यसले विभिन्न उद्योगपति र व्यवसायीलाई प्रत्यक्ष समन्वय र सहकार्यको अवसर उपलब्ध गराउने बताए।
एक्सपोमा विभिन्न उद्योगका प्रमुख विज्ञहरुले कार्यशाला र प्यानल छलफल गर्ने कार्यक्रम समेत रहनेछ। नेपालसहित अन्य देशका निर्माता, वितरक, सरकारी अधिकारी, लगानीकर्ता र विचारशील व्यक्तिहरुको सहभागिता रहने आयोजकहरुले जानकारी दिएका छन्।
यस एक्सपोमा उद्योग तथा पर्यटन मन्त्रालय, मधेश प्रदेश सरकार, उद्योग विभाग, जनकपुरधाम उप–महानगरपालिका र नेपाल फ्रेट फर्वाडर एशोसिएसनलगायतका संस्थाहरुको सहयोग र सहकार्य रहनेछ।
तपाईको ईमेल गोप्य राखिनेछ