संजय विश्वकर्मा
लहान, १७ पौस । सिरहाको बरियारपट्टी गाउँपालिका–३ श्रीपुर निवासी सत्यनारायण साफि दलित आरक्षण कोटाबाट एमबिबिएस अध्ययनका लागि पूर्ण छात्रवृत्तिमा नाम निकाल्न सफल भएसँगै सहयोगी हातहरू अगाडि बढ्न थालेका छन् ।
सोही क्रममा सुनचाँदी व्यवसाय संघका केन्द्रीय सदस्य तथा उद्योग वाणिज्य संघ लहानका वर्तमान अध्यक्ष विकास सारडाले आज आफ्नो जन्मदिनको अवसर पारेर सत्यनारायण साफिको अध्ययन सहयोगका लागि पाँच वर्षसम्म हरेक महिना रु. १० हजार प्रदान गर्ने घोषणा गर्नुभएको छ । यसअनुसार कुल पाँच वर्षमा रु. ६ लाख आर्थिक सहयोग उपलब्ध हुनेछ ।
त्यसैगरी उद्योग वाणिज्य संघ लहान–सिरहाको आसन्न अध्यक्ष पदका उम्मेदवार रहेका प्रदीप कुमार गुप्ताको प्यानलको तर्फबाट रु. २५ हजार आर्थिक सहयोग प्रदान गरिएको समाजसेवी तथा स्कुल अफ स्कलर्स लहानका संस्थापक प्रिन्सिपल सुदिपराज कुशवाहाले सामाजिक सञ्जाल फेसबुकमार्फत जानकारी दिनुभएको छ ।
एमबिबिएसमा पूर्ण छात्रवृत्तिमा नाम निकालेसँगै सत्यनारायणको एमविविएस पढ्न शुल्क नलाग्ने भए पनि आवास, किताब–कापी, खाना लगायतका खर्चका लागि आर्थिक सहयोग आवश्यक पर्ने भएकाले उक्त सहयोग गरिएको सारडाले बताउनुभयो । अध्ययन अवधिभर सारडाको तर्फबाट करिब रु. ६ लाख सहयोग पुग्ने देखिएको छ, जुन अहिलेसम्म सत्यनारायणका लागि प्राप्त सबैभन्दा ठूलो सहयोग राशी हो ।
दैनिक ज्यालामजदुरी गरेर जीविकोपार्जन गर्ने परिवारबाट आएका सत्यनारायण साफि हाल सामाजिक सञ्जालमा ‘भाइरल’ बनेका छन् । समाजिक संजालमा भाईरल गराउने पात्र पत्रकार संतोष कुमार यादव हुन् । दलित कोटाबाट पूर्ण छात्रवृत्तिमा एमबिबिएसमा नाम निकाल्ने उनी पहिलो व्यक्ति भने होइनन्, तर उनको संघर्षपूर्ण जीवनकथा धेरैका लागि प्रेरणाको स्रोत बनेको छ ।
जनता माध्यमिक विद्यालय (प्राविधिक धार) बरियारपट्टीबाट २०७७ सालमा एसइई उत्तीर्ण गरेका उनले अरनिको उच्च माध्यमिक विद्यालय विराटनगरबाट २०७९ सालमा विज्ञान विषयमा कक्षा ११–१२ पूरा गरेका थिए। त्यसपछि एमबिबिएस प्रवेश परीक्षा तयारीका लागि काठमाडौं पुगेका उनले भाइब्रेन्ट कोचिङ सेन्टरमा नाम लेखाए पनि आर्थिक अभावका कारण तीन महिना नबित्दै काठमाडौं छाडेर घर फर्कन बाध्य भए ।
त्यही समयमा कतारमा रोजगारीमा रहेका उनका बुवासमेत बेरोजगार भएर घर फर्किएपछि परिवारको आर्थिक अवस्था झन् कमजोर भयो । ‘मजदुरी रोज्ने कि पढाइ?’ भन्ने कठिन परिस्थितिमा पुगेका सत्यनारायणले मजदुरी गर्दै पढाइ अघि बढाउने निर्णय गरे। दिनभर गाउँमै मजदुरी गर्ने र रातभर पढ्ने उनको दैनिकी बन्यो। मजदुरीबाट जोगिएको रकमले किताब किने र त्यसैबाट बचत गरेर काठमाडौं पुगेर एमबिबिएस प्रवेश परीक्षा दिए। पहिलो प्रयासमै पूर्ण छात्रवृत्तिमा नाम निकाल्न सफल भएपछि उनको संघर्ष सफलतामा परिणत भएको हो।
सत्यनारायण साफिलाई प्राप्त यस किसिमको सहयोगले उनको शैक्षिक भविष्य उज्यालो बनाउने विश्वास गरिएको छ ।
तपाईको ईमेल गोप्य राखिनेछ