लहान २६, माघ । नेपाली कांग्रेसका सभापति गगन कुमार थापा भोलि मंगलबार २०८२ माघ २७ गते दिउँसो १२ बजे सिरहाको लहानस्थित दुर्गा मन्दिर नजिक (लहान पुरानो बजार) मा आउने भएका छन् । उनको आगमनसँगै नेपाली कांग्रेसले कार्यकर्ता भेटघाट तथा अन्तरक्रिया कार्यक्रम आयोजना गरेको जनाएको छ ।
नेपाली कांग्रेस सिरहा–१ का क्षेत्रीय सभापति तथा लहान नगरपालिकाका नगर प्रमुख महेश प्रसाद चौधरीका अनुसार सभापति थापाले स्थानीय नेता–कार्यकर्ता तथा शुभेच्छुकहरूसँग प्रत्यक्ष भेटघाट गर्दै पार्टीको वर्तमान अवस्था, संगठन सुदृढीकरण तथा समसामयिक राजनीतिक विषयमा छलफल गर्ने कार्यक्रम रहेको छ ।
नगर प्रमुख चौधरीले नेपाली कांग्रेसमा आबद्ध सम्पूर्ण तह–तप्काका नेता, कार्यकर्ता, भातृ तथा शुभेच्छुकहरूलाई कार्यक्रममा उपस्थित भई सफल बनाउन समाजिक संजाल फेसवुक मार्फत हार्दिक अनुरोध गरेका छन् । उनले पार्टीलाई थप सशक्त र एकताबद्ध बनाउन यस्ता भेटघाट कार्यक्रम प्रभावकारी हुने विश्वास व्यक्त गरे ।
कार्यक्रममा जिल्लास्थित पार्टी पदाधिकारी, जनप्रतिनिधि, भातृ संगठनका नेता तथा कार्यकर्ताहरूको उल्लेख्य सहभागिता रहने अपेक्षा गरिएको छ । सभापति थापाको लहान भ्रमणलाई कांग्रेस वृत्तमा विशेष महत्वका साथ हेरिएको छ ।
स्थानीय तहदेखि केन्द्रसम्म पार्टी संगठनलाई मजबुत बनाउने उद्देश्यले सभापति थापाले देशका विभिन्न जिल्लामा कार्यकर्ता भेटघाट कार्यक्रमलाई तीव्रता दिँदै आएका छन् । सोही अभियानअन्तर्गत लहानमा पनि कार्यक्रम तय गरिएको बताइएको छ ।
तपाईको ईमेल गोप्य राखिनेछ