लहान ०८, फागुन । नेपाली कांग्रेस सिरहा क्षेत्र नम्बर १ क्षेत्रीय कार्यसमितिले पार्टी हितविपरीत गतिविधिमा संलग्न भएको आरोपमा चार जनामाथि कारबाहीको सिफारिस गरेको छ।
क्षेत्रीय कार्यसमितिले नेपाली कांग्रेसका पुर्व जिल्ला उपसभापति तथा महासमिति सदस्य विष्णु प्रसाद गुप्ताले अन्य दलका उम्मेदवारको पक्षमा मत मागिरहेको पाइएकाले उनलाई पार्टीको साधारण सदस्यसमेत नरहने गरी निष्कासन गर्न केन्द्रीय कार्यालयमा सिफारिस पठाएको जनाएको छ। गुप्ताको छोरा बब्लु गुप्ता रास्वपाबाट सिरहा क्षेत्र नम्बर १ को प्रतिनिधिसभा सदस्यको उम्मेदवार बनेकोले यसअघि नै कांग्रेसबाट राजीनामा दिएको पत्रकार सम्मेलन मार्फत उनि जानकारी गराएका थिए ।
यसैगरी, जनमत पार्टीबाट सिरहा क्षेत्र नम्बर – १ का प्रतिनिधि सभा सदस्यको उम्मेदवार बनेका लहान–१ निवासी राम स्वरुप चौधरी, स्वतन्त्रबाट सिरहा क्षेत्र नम्बर १ का प्रतिनिधि सभा सदस्यको उम्मेदवार बनेका सन्तोष सिलवाल गिरि तथा सामाजिक सञ्जालमार्फत नेपाली कांग्रेसविरुद्ध जथाभावी लेखेको आरोप लागेका लहान–१३ निवासी श्रीराम राउतमाथि पनि कारबाहीको सिफारिस केन्द्रीय समितिमा पठाइएको सिरहा क्षेत्र नम्बर १ का क्षेत्रीय सभापति तथा लहान नगरपालिकाका नगर प्रमुख समेत रहेका महेश प्रसाद चौधरीले जनाएको छ।
त्यस्तै, पार्टीका विभिन्न तहका नेता तथा कार्यकर्ताले फेसबुक, टिकटक लगायत सामाजिक सञ्जाल र सञ्चारमाध्यममा कांग्रेसविरुद्ध प्रकाशित समाचारमा कमेन्ट र लाइक गरेको पाइएमा २०८२ फागुन १८ गतेदेखि साधारण सदस्यसमेत नरहने गरी निष्कासन गरिने चेतावनी समेत क्षेत्रीय कार्यालयले दिएको छ।
क्षेत्रीय कार्यसमितिले पार्टीको विधान विपरीत नजान अनुशासनको पालना गर्न सबै नेता तथा कार्यकर्तालाई आग्रहसमेत गरेको छ।
तपाईको ईमेल गोप्य राखिनेछ