लहान–१२, चैत्र । विद्यालय बाहिर रहेका बालबालिकालाई शिक्षातर्फ आकर्षित गर्ने उद्देश्यले सिरहामा शैक्षिक सामग्री तथा नगद वितरण गरिएको छ।
‘स्टुडेन्ट किट’ कार्यक्रम अन्तर्गत सिरहाको कल्याणपुर नगरपालिका–६ स्थित कमला सामुदायिक सिकाई केन्द्रमा अध्ययनरत विद्यार्थीहरुलाई सामग्री प्रदान गरिएको केन्द्रकी सामाजिक परिचालिका किरण कुमारी साहले जानकारी दिइन्।
उनका अनुसार सिकाई केन्द्रमा अध्ययनरत ९ देखि १५ वर्ष उमेर समूहका ३५ जना विद्यार्थीलाई प्रति विद्यार्थी १ थान झोला, १ सेट पोशाक, ४ वटा अन्डरपाइन्ट, १२ वटा कापी, १२ वटा कलम, १२ वटा पेन्सिल, ३ वटा रुमाल, १ वटा काइँयो र १ वटा नङ काट्ने (नेल कटर) लगायतका शैक्षिक सामाग्री वितरण गरिएको हो।
त्यसैगरी, बालबालिकालाई डिजिटल शिक्षामा पहुँच विस्तार गर्ने उद्देश्यले उक्त केन्द्रलाई १२ वटा ल्यापटपसमेत हस्तान्तरण गरिएको छ।
कार्यक्रम अन्तर्गत सोही केन्द्रमा अध्ययनरत १० वटा विपन्न परिवारलाई प्रति परिवार २० हजार रुपैयाँका दरले नगद अनुदान पनि प्रदान गरिएको छ।
मधेश प्रदेशका धनुषा र सिरहा जिल्लामा युनिसेफ नेपालको आर्थिक सहयोग तथा SODCC पर्साको समन्वयमा कार्यक्रम सञ्चालन हुँदै आएको छ। सिरहाको कल्याणपुर नगरपालिका–६ को कमला सामुदायिक सिकाई केन्द्र र नवराजपुर गाउँपालिकाको शहीद रमेश महतो सामुदायिक सिकाई केन्द्र तथा धनुषाको जनकपुरस्थित हनुमान सामुदायिक सिकाई केन्द्रमा कार्यक्रम सञ्चालन भइरहेको छ।
SODCC पर्साका अध्यक्ष मो. ईब्राहिमका अनुसार कल्याणपुरस्थित उक्त केन्द्रको कार्यसम्पादन उत्कृष्ट रहेको छ।
कमला सामुदायिक सिकाई केन्द्रका अध्यक्ष बिनय महासेठको अध्यक्षतामा सम्पन्न कार्यक्रममा कल्याणपुर नगरपालिकाका शिक्षा शाखा प्रमुख जयप्रकाश दास, SODCC पर्साका प्रतिनिधि विशाल गुप्ता लगायतको उपस्थिति रहेको थियो । कार्यसम्पादन उत्कृष्ट रहेको सो केन्द्रमा किशोरी शिक्षा कार्यक्रम अन्तर्गत समग्र जनउत्थान केन्द्र लहान र समुन्नत नेपालले पनि अर्थिक तथा प्राविधिक सहयोग गरिरहेको संस्थापक अध्यक्ष कुशेश्वर पञ्जियारले बताए ।
तपाईको ईमेल गोप्य राखिनेछ