लहान ०५, फागुन । नेपाली काँग्रेसका पुराना तथा संघर्षशील नेता रामसुन्दर चौधरी आगामी २०८२ फागुन २१ गते हुने निर्वाचनमा सिरहा क्षेत्र नम्बर १ बाट प्रतिनिधिसभा सदस्यका उम्मेदवार बनेका छन्। विद्यार्थी जीवनदेखि नै पार्टी राजनीति र समाजसेवामा सक्रिय चौधरी चार दशकभन्दा लामो राजनीतिक अनुभव बोकेका नेताका रूपमा परिचित छन्।
वि.सं. २०१९ साल असार १ गते सिरहा जिल्लाको साविक सितापुर गाविस, हाल लक्ष्मीपुर पतारी गाउँपालिका–६ सितापुरमा जन्मिएका चौधरीले स्नातकसम्मको औपचारिक शिक्षा हासिल गरेका छन्। सामान्य किसान परिवारमा जन्मिएका उनी सानैदेखि सामाजिक गतिविधिमा रुचि राख्थे।
चौधरीले विद्यार्थी जीवनमै राजनीति रोजेका थिए। वि.सं. २०३६ सालमा जनकपुरस्थित आर.आर. क्याम्पस जनकपुरमा अध्ययनका क्रममा उनले नेपाल विद्यार्थी संघमार्फत आफ्नो राजनीतिक यात्रा सुरु गरेका हुन्। त्यही वर्ष सम्पन्न ऐतिहासिक जनमत संग्रहमा उनले बहुदलीय व्यवस्थाको पक्षमा सक्रिय भूमिका निर्वाह गरेका थिए।
उक्त जनमत संग्रहको सम्झना गर्दै चौधरीले भने, “स्वर्गीय नेता प्रदीप गिरिको नेतृत्वमा हामी बहुदलको पक्षमा खुलेर लाग्यौं। त्यो बेला सिरहाले देशभरमै बहुदलको पक्षमा उल्लेखनीय मत दिएको थियो, जसले हामीलाई थप उत्साहित बनायो।”
वि.सं. २०४६ सालको जनआन्दोलनपछि चौधरीको राजनीतिक सक्रियता अझै बढ्यो। प्रजातन्त्र पुनःस्थापनापछि उनले पार्टी संगठन सुदृढीकरणमा महत्वपूर्ण भूमिका खेले। वि.सं. २०४७ सालमा उनी नगरसभापतिको जिम्मेवारीमा निर्वाचित भएका थिए। त्यसपछि पनि उनले निरन्तर रूपमा पार्टीमा सक्रिय रहँदै जिल्ला कार्यसमितिमा विभिन्न पद सम्हाले।
उनले दुई कार्यकाल जिल्ला उपसभापतिको जिम्मेवारी समेत सफलतापूर्वक निर्वाह गरेका छन्। पार्टी संगठन विस्तार, कार्यकर्ता परिचालन र जनताका मुद्दालाई उठाउने काममा उनले निरन्तर योगदान दिँदै आएका छन्। स्थानीय तहदेखि केन्द्रीय राजनीतिसम्म पार्टीलाई मजबुत बनाउने अभियानमा उनी सक्रिय रहेको उनका सहकर्मीहरू बताउँछन्।
चौधरी समाजसेवामा पनि उत्तिकै सक्रिय छन्। शिक्षा, स्वास्थ्य, विपन्न वर्गको सहयोग तथा सामाजिक सचेतनामूलक कार्यक्रमहरूमा उनको उल्लेखनीय भूमिका रहेको स्थानीयवासीको भनाइ छ। उनी जनतासँग प्रत्यक्ष सम्पर्कमा रहने र जनभावना अनुसार काम गर्ने नेताका रूपमा चिनिन्छन्।
आगामी निर्वाचनलाई लक्षित गर्दै चौधरीले विकास, सुशासन र जनताको अधिकार सुनिश्चित गर्ने मुख्य एजेण्डा अघि सारेका छन्। उनले भने, “मैले जीवनभर पार्टी र जनताको सेवामा काम गरेको छु। अब जनताको विश्वासलाई प्रतिनिधिसभामा प्रतिनिधित्व गर्दै सिरहाको समग्र विकासका लागि काम गर्ने मेरो प्रतिबद्धता छ।”
लामो राजनीतिक अनुभव, संगठनमा बलियो पकड र जनस्तरमा स्थापित छवि भएका चौधरीको उम्मेदवारीलाई नेपाली काँग्रेस वृत्तमा महत्वपूर्ण रूपमा हेरिएको छ। पार्टीभित्र उनको योगदान र अनुभवका आधारमा आगामी निर्वाचनमा उनको भूमिका निर्णायक हुन सक्ने विश्लेषण गरिएको छ।
चार दशकभन्दा लामो संघर्ष र निरन्तर सक्रियतापछि प्रतिनिधिसभा सदस्यका लागि उम्मेदवार बनेका चौधरीले आफ्नो राजनीतिक यात्रालाई अब नयाँ चरणमा पुर्याउने लक्ष्य लिएका छन्।
तपाईको ईमेल गोप्य राखिनेछ