लहान २५, माघ । वार्षिक खेलकुद कार्यक्रम अन्तर्गत सलहेश फुलवाडी सेकेन्ड्री ईङ्गलिस बोर्डिङ्ग स्कुल, लहान–१२ ले आजदेखि खेलकुद प्रतियोगिता सञ्चालन गरेको छ। विद्यालय परिसरमै आयोजित एक औपचारिक कार्यक्रमका बीच विद्यालयका संस्थापक प्रिन्सिपल शिवकान्त चौधरीले प्रतियोगिताको विधिवत उद्घाटन गर्नुभयो।
उद्घाटन समारोहमा बोल्दै प्रिन्सिपल चौधरीले विद्यार्थीको शारीरिक, मानसिक तथा बौद्धिक विकासका लागि खेलकुद अत्यन्त आवश्यक रहेको बताउनुभयो। उहाँले खेलकुदले अनुशासन, नेतृत्व क्षमता, सहकार्य भावना र आत्मविश्वास विकास गर्न महत्वपूर्ण भूमिका खेल्ने उल्लेख गर्नुभयो। “पढाइसँगै खेलकुदलाई पनि समान प्राथमिकता दिनुपर्छ भन्ने उद्देश्यले विद्यालयले प्रत्येक वर्ष वार्षिक खेलकुद कार्यक्रम आयोजना गर्दै आएको छ,” उहाँले भन्नुभयो।
प्रतियोगितामा उक्त विद्यालयका नर्सरीदेखि कक्षा १० सम्मका विद्यार्थीहरू सहभागी हुनेछन्। विभिन्न उमेर समूहलाई समेटेर आयोजना गरिएको प्रतियोगितामा फुटबल, भलिबल, कबड्डी, दौड, लङ जम्प, हाई जम्प लगायत २८ प्रकारका खेल समावेश गरिएको विद्यालय प्रशासनले जनाएको छ। साना कक्षाका विद्यार्थीहरूका लागि मनोरञ्जनात्मक तथा रचनात्मक खेलहरू राखिएको छ भने माथिल्लो कक्षाका विद्यार्थीहरूका लागि प्रतिस्पर्धात्मक खेलहरू सञ्चालन गरिनेछ।
विधालयका शिक्षक–शिक्षिका, अभिभावक तथा विद्यार्थीहरूको उपस्थितिमा उद्घाटन कार्यक्रम सम्पन्न भएको थियो। कार्यक्रममा विद्यालयका खेल शिक्षकहरूले खेल तालिका, नियम तथा अनुशासन सम्बन्धी जानकारी गराएका थिए।
प्रतियोगिता माघ २९ गतेसम्म सञ्चालन हुने र उत्कृष्ट प्रदर्शन गर्ने विद्यार्थी तथा टोलीलाई समापन समारोहमा पुरस्कार, प्रमाणपत्र तथा ट्रफी प्रदान गरिने विद्यालयले जनाएको छ। यस प्रकारका कार्यक्रमले विद्यार्थीहरूमा प्रतिस्पर्धात्मक भावना अभिवृद्धि गर्नुका साथै उनीहरूलाई स्वस्थ जीवनशैली अपनाउन प्रेरित गर्ने विश्वास विद्यालय परिवारले व्यक्त गरेको छ।
विद्यालयका अनुसार वार्षिक खेलकुद कार्यक्रमले विद्यार्थीहरूबीच आपसी सद्भाव, सहकार्य र मित्रताको भावना विकास गर्न समेत सहयोग पुर्याउने गरेको छ। खेलकुदमार्फत लुकेका प्रतिभाहरूको पहिचान र प्रोत्साहन गर्न सकिने भएकाले यस्ता कार्यक्रमलाई निरन्तरता दिइने प्रिन्सिपल चौधरीले जानकारी दिनुभयो।
यस प्रतियोगिताले विद्यालयमा उत्साह र उमंग थपिएको छ भने विद्यार्थीहरू पनि आ–आफ्नो खेलमा उत्कृष्ट प्रदर्शन गर्न तयारीका साथ मैदानमा उत्रिएका छन्।
तस्विरहरु :
तपाईको ईमेल गोप्य राखिनेछ